Modernistlər

1920-ci illərin Paris mühiti incəsənət axtarışında olan amerikalı mühacirləri bir araya gətirir. Rəssam Nik Hart uzun müddətdir ki, istedadını tanıtmağa və sənət aləmində yer tapmağa çalışır. Bu zaman "Tribun" qəzeti üçün dedi-qodular qələmə alan jurnalist Uazo Hollivud xəyalları qurur, Ernest Heminquey isə elə oradaca, bar piştaxtası arxasında əsərlərini yazır.

Nik tezliklə təmkinli görünüşü altında qəddarlıq gizlənən varlı sənət taciri Bertram Stoun ilə qarşılaşır. Üstəlik, Stounun həyat yoldaşı Reyçel Nikin keçmiş sevgilisidir və rəssam onunla münasibətlərini bərpa etməyə ümid bəsləyir. İncəsənət hamisi Natali isə Niki bir neçə rəsm əsərini saxtalaşdırmağa sövq edir və prosesə iflas etmiş qalereya sahibi Libbi də qarışır.

1988-ci ildə ABŞ-da istehsal olunmuş «Modernistlər» filminin rejissoru Alan Rudolfdur. Dram, komediya və melodrama janrlarını birləşdirən ekran əsərində baş rolları Kit Kerredin, Linda Fiorentino, Uolles Şoun və Jenevyev Byujo ifa ediblər.