Mənim dayım Arximed

Müharibə başa çatdıqdan sonra Arximed yetim qalmış bacısı oğlunu övladlığa götürmək qərarına gəlir. Uşaq evində o, gələcək həyat yoldaşı Penelope ilə tanış olur. Üç nəfərdən ibarət bu yunan ailəsi 1949-cu ildə Çexoslovakiyanın Brno şəhərinə köçür. Cibində heç bir vəsaiti olmayan və yerli dili bilməyən Arximed burada azad və firavan bir həyat quracağına ümid bəsləyir.

Tədricən ailənin məişəti qaydasına düşür. Uşaq məktəbə getməyə başlayır, Arximed təsərrüfatda iş tapır, Penelope isə mehriban qonşunun yardımı ilə çex dilini öyrənir. Lakin Arximedin sosializm idealları sarsılır və doğma Yunanıstana qayıtmaq arzusu daha da güclənir. Sərhədlərin tam bağlı olması səbəbindən vətənə dönmək istəyən ailə qeyri-adi və yaradıcı üsullara əl atmaq məcburiyyətində qalır.

«Muj strycek Archimedes» adlı komediya-dram filmi rejissor Georgis Agathonikiadis tərəfindən lentə alınıb. Çexiya, Fransa və Almaniyanın birgə istehsalı olan bu ekran əsəri 2018-ci ildə işıq üzü görüb. Baş rolları Ondjey Vetxi, Miroslav Donutil, Dana Çerna və Veronika Freymanova canlandırıb.