Zəriflik

Həyat yoldaşını avtomobil qəzasında itirən Natali kədərini unutmaq üçün bütün diqqətini işinə yönəldir. Özünə qapanaraq karyerasında sürətlə irəliləyən qadın şəxsi həyatını tamamilə arxa plana atır.

Adi günlərin birində onun kabinetinə heç kimin fikir vermədiyi, sadə və diqqətçəkməz həmkarı Markus daxil olur. Öz düşüncələrinə qərq olmuş Natali gözlənilməz bir duyğuya qapılaraq kişini öpür. Bu ani hərəkət hər iki tənha insanın sonrakı həyatını büsbütün dəyişir.

2011-ci il istehsalı olan «Zəriflik» (La délicatesse) filmi Fransa kinematoqrafçıları David Fonkinos və Stefan Fonkinos tərəfindən çəkilib. Romantik komediya-dram janrındakı ekran əsərində baş rolları Odri Totu, Fransua Damyens, Bruno Todeski və Melani Bernye canlandırır.