Artıq adam

Estrada müğənnisi Toni Pizapia daim dinləyicilərin diqqətində olmağa və gənc pərəstişkarları ilə əlaqələr qurmağa alışıb. Növbəti qalmaqalın üstü açıldıqdan sonra onun bütün nizamı darmadağın olur. İtirilmiş nüfuzdan sonra təsəlli tapdığı yeganə məşğuliyyət isə illər əvvəl həbsxanada yatarkən yiyələndiyi balıq yeməkləri bişirmək bacarığıdır.

Futbolçu Antonio Pizapia Toni ilə eyni gündə doğulsa da, ondan on yaş kiçikdir. Karyerasının ən parlaq dövrünü yaşayan idmançı klub rəhbərinin sözünə güvənərək gələcəkdə məşqçi kimi fəaliyyət göstərməyi hədəfləyir. Lakin gözlənilməz zədə idman həyatını yarımçıq qoyur və bütün arzularını alt-üst edir.

İtaliya istehsalı olan «L'uomo in più» dram komediyası 2001-ci ildə Paolo Sorrentino tərəfindən çəkilib. Ekran işində əsas rolları Toni Servillo, Andrea Rentzi, Antonino Brusketta və Ancela Qudvin canlandırıb.