Dərinlik

Məktəbi yenicə bitirən Mayk Londonun kənarındakı ictimai hovuzda nəzarətçi kimi işə düzəlir. Gənc oğlan burada kişilərin diqqət mərkəzində olan cazibədar qırmızısaç Syuzanla tanış olur. İlk baxışdan sonra Maykın ağlı-fikri yalnız bu qadının yanında qalır.

Syuzanın yaşca xeyli böyük olması gənci qətiyyən çəkindirmir və o, inadla sevgilisinin diqqətini çəkməyə çalışır. Nəhayət, onun səbri öz bəhrəsini verir. Lakin Syuzanın evli üzgüçülük təlimatçısı ilə gizli münasibəti olduğunu öyrənən Mayk onların arasına girməyə cəhd edir və bu addım faciəvi sonluqla nəticələnir.

1970-ci ildə ekranlara çıxan «Deep End» filmi Böyük Britaniya və Qərbi Almaniyanın birgə istehsalıdır. Ekran əsərinin rejissoru Yeji Skolimovskidir, baş rolları isə Con Moulder-Braun, Ceyn Eşer, Karl Mixael Foqler və Kristofer Sendford canlandırıb.