Elmi üsulla kart oyunu

Peppino və Antoniya adlı yoxsul ər-arvad hər il okeanın o tayından gələn varlı bir qoca qadının yolunu səbirsizliklə gözləyir. Bu görüş onların pul qazanmaq və güzəranlarını düzəltmək üçün yeganə ümididir. Qumar həvəskarı olan yaşlı qonaq hər dəfə onlarla kart masası arxasına keçməyi adətə çevirib.

İtaliyalı cütlüyün mərcə qoymağa heç nəyi olmadığından, qadın ilkin vəsaiti onlara öz cibindən borc verir. Yoxsul ər-arvad qələbə qazanmağa çalışsa da, indiyədək heç kəs bu varlı qadının məğlub olduğunu xatırlamır. Tərəflər yenidən şanslarını sınamaq üçün eyni masaya toplaşırlar.

1972-ci ildə çəkilmiş «The Scientific Cardplayer» komediya-dram filminin rejissoru Luici Komençinidir. İtaliya istehsalı olan ekran əsərində baş rolları Alberto Sordi, Silvana Manqano, Cozef Kotten və Bett Devis ifa ediblər.