Femme

Culs Afrodita Benks adlı dreq obrazı ilə səhnədə çıxış edir və tamaşaçıların rəğbətini qazanır. Növbəti çıxışından sonra o, qəfil küçə hücumuna məruz qalır. Culs fiziki xəsarətlərdən qurtulsa da, aldığı psixoloji zərbə ona əvvəlki həyatına qayıtmağa mane olur.

Aylar keçdikdən sonra Culs təsadüfən ona hücum edənlərdən birini tanıyır. Qrimsiz və adi görkəmdə olan Culs cinayətkar Prestonun diqqətini cəlb etmədən ona yaxınlaşa bilir. O, Preston haqqında daha çox şey öyrənmək və ondan qisas almaq üçün bu fürsətdən istifadə etmək qərarına gəlir.

Böyük Britaniya istehsalı olan «Femme» dramatik triller filmi Sem H. Friman və Nq Çun Pinqin rejissorluğu ilə ərsəyə gəlib. Əsas rolları Neytan Stüart-Carrett, Corc Makkey, Aaron Heffernan və Nima Taleqani canlandırıb. Ekran əsəri 2023-cü ildə nümayiş olunub.