Honey

Nyu-York sakini Hani Daniels musiqi videolarında tanınmış xoreoqraf olmaq arzusundadır. Məqsədinə doğru addımlayan gənc qız eyni zamanda barda çalışır, musiqi mağazasında satıcılıq edir və yerli mərkəzdə gənclərə rəqs dərsləri keçir. Təsadüfən onun rəqs videosunu görən rejissor Maykl Ellis Hanini əvvəlcə arxa planda rəqs etməyə dəvət edir, sonra isə ona kliplərin quruluşunu həvalə edir.

Karyerasında sürətlə irəliləyən gənc mütəxəssis tezliklə gözlənilməz problemlə üzləşir. Şənliklərin birində Maykl ona qarşı nalayiq hərəkət edərək yaxınlıq tələb edir. Hanidən sərt cavab və sillə alan rejissor qızı dərhal işdən qovur. Bütün işlərini itirən rəqqasə yenidən doğma məhəlləsinə qayıdır və uğura gedən yolunu təkbaşına axtarmağa məcbur qalır.

«Honey» filmi 2003-cü ildə ABŞ-da istehsal olunub. Rejissor Bille Vudraffun lentə aldığı dram janrlı musiqili ekran əsərində baş rolları Cessika Alba, Mekay Fayfer, Lil Romeo və Coy Brayant canlandırır.