Düz saat 3-də

Yuxarı sinif şagirdi Cerri Mitçel üçün adi bir dərs günü məktəbə gecikməklə başlayır. Həmin vaxt təhsil ocağına yeni gələn kobud və davakar Baddi Revell ilə tanışlıq uğursuz alınır. Təsadüfi toqquşmadan qəzəblənən nəhəng xasiyyətli Baddi Cerriyə günorta saat üçdə təkbətək döyüş təyin edir.

Rəqibinin ondan xeyli hündür və güclü olduğunu görən Cerri böyük təşvişə düşür. Bu davanın onun üçün çox ağır nəticələnəcəyini başa düşən yeniyetmə qarşıdurmadan xilas olmağın yollarını axtarır. Saatın əqrəbləri təyin olunan vaxta doğru irəlilədikcə o, məktəb duelindən yayınmaq üçün müxtəlif variantları sınayır.

ABŞ istehsalı olan «Düz saat 3-də» (Three O'Clock High) filmi komediya, dram və triller janrlarını birləşdirir. 1987-ci ildə ekranlara çıxan filmin rejissoru Fil Coanudur. Əsas rolları Keysi Semaşko, Enn Rayan, Riçard Tayson və Steysi Qlik canlandırıb.