Hisslərin qarışıqlığı

Gənc Rolan atasının qərarı ilə Berlinin səs-küylü mühitindən uzaqlaşaraq Almaniyanın mərkəzində yerləşən sakit bir əyalət şəhərinə yollanır. O, burada yerli universitetdə təhsil almağa başlayır və bütün diqqətini dərslərinə yönəltməyi planlaşdırır. Tələbə qısa müddətdə Şekspir və dövrün ədəbiyyatı haqqında mühazirələr oxuyan filologiya professorunun dərslərinə böyük maraq göstərir.

Rolan dərslərinə daha yaxşı hazırlaşmaq üçün həmin müəllimin evində bir otaq kirayələyir. Lakin bu dəfə onun diqqətini paytaxtın əyləncələri deyil, professorun və onun ailəsinin ətrafındakı müəmmalı ab-hava yayındırmağa başlayır. Evdə gizlədilən sirlər gəncin sakit təhsil həyatına mane olur.

«Hisslərin qarışıqlığı» (La confusion des sentiments) adlı dram filmi 1981-ci ildə rejissor Etyen Perye tərəfindən çəkilib. Fransa və Almaniya (AFR) istehsalı olan bu ekran əsərində baş rolları Mişel Pikkoli, Pyer Male, Gila fon Vaytershauzen və Haynts Vayss canlandırıblar.