Təslim olma

Avtomobil qəzasında valideynlərini itirən və klinik ölüm keçirən Enok yad insanların dəfn mərasimlərinə getməyə başlayır. Qəbiristanlıqların birində o, Annabel adlı qızla qarşılaşır. Qısa müddət sonra bu təsadüfi görüş gənclər arasında səmimi və romantik münasibətin yaranmasına səbəb olur.

Çox keçmədən Annabelin ölümcül xəstəlikdən əziyyət çəkdiyi məlum olur. Bu acı həqiqəti öyrənən Enok sevdiyi qızdan uzaqlaşmır, əksinə, qaçılmaz sona hazırlaşmaq üçün hər an onun yanında qalmağa qərar verir. «Restless» filmi həyatla vidalaşma ərəfəsində olan iki gəncin hisslərindən bəhs edir.

2011-ci il istehsalı olan bu ABŞ melodramının rejissoru Qas Van Sentdir. Əsas rolları Henri Hopper, Mia Vasikovska, Ryo Kase və Skayler Fisk canlandırıblar.