Ağlama, ana

Boşanmadan sonra Yu-rim qızı In-a ilə birgə təmiz səhifə açmaq ümidi ilə başqa mənzilə köçür. Sakit təbiətli, violonçeldə ifa etməyi sevən məktəbli qız yeni mühitdə həmyaşıdlarının sataşmaları ilə üzləşir. Sinif yoldaşlarının qəddarlığı həddi aşır və bir qrup yeniyetmə qıza qarşı ağır cinayət törədir.

Yaşadığı psixoloji sarsıntı və davam edən təzyiqlər qarşısında aciz qalan In-a həyatına son qoyur. Hadisəni törədən oğlanlar yetkinlik yaşına çatmadıqları üçün qanun qarşısında çox yüngül cəza ilə yaxalarını qurtarırlar. Məhkəmənin ədalətsiz qərarı ilə barışa bilməyən ana günahkarları öz üsulları ilə cəzalandırmaq yolunu seçir.

Cənubi Koreya istehsalı olan «Don keurai mami» dram filmi 2012-ci ildə ekranlara çıxıb. Ekran əsərinin rejissoru Kim Yon-handır. Əsas rolları Yu Son, Ton Ho, Kvon Hyon-san və Nam Bo-ra canlandırıb.