DitO

Yaponiyalı boksçu Eyci Kamiyama idman karyerasını yenidən qurmaq məqsədilə illər öncə ailəsini tərk edərək Filippinə köçüb. İllər ötüb, artıq qırx yaşına çatan idmançı Manilanın yoxsul məhəllələrində sadə bir ömür sürür və peşəkar rinqə qayıda bilmir. Bir gün onun məşq etdiyi zala qəfil gələn on yeddi yaşlı qızı Momoko anasının vəfat etdiyini xəbər verir.

Gənc qız atasında güclü bir arxa tapacağını zənn etsə də, qarşısında xəyal etdiyi qəhrəmandan çox uzaq bir insan görür. «DitO» filmində uzun illər bir-birindən ayrı qalmış bu iki doğma insan eyni dam altında yaşamaq və münasibətlərini yenidən qurmaq məcburiyyətində qalır.

Ekran əsərinin rejissoru Takaşi Yukidir. 2024-cü ildə Yaponiya və Filippinin birgə istehsalı ilə çəkilmiş dram janrlı bu filmdə baş rolları Mon Konfiado, Lesli Lina, Yukihiko Mizomoto və Maçiko Ono canlandırıb.