İnsan amili

Reklam agentliyinə rəhbərlik edən ər-arvad Nina və Yan mürəkkəb bir sifarişçi ilə müqavilə bağlayırlar. Müştərinin siyasi mövqeyi cütlük arasında kəskin fikir ayrılığı və mübahisələr yaradır. İş gərginliyindən uzaqlaşmaq istəyən ailə uşaqları ilə birlikdə dəniz sahilinə dincəlməyə getmək qərarına gəlir.

Sakit və xoş keçməli olan bu istirahət qəfil baş verən müəmmalı hadisədən sonra əsl kabusa çevrilir. Baş verənlər ailə üzvləri arasındakı münasibətləri sınağa çəkir və gərginliyi daha da dərinləşdirir. «Human Factors» filmi bu gözlənilməz hadisənin yaratdığı nəticələri təsvir edir.

Triller və dram janrında çəkilmiş ekran əsərinin rejissoru Ronni Trokerdir. Almaniya, İtaliya və Danimarka istehsalı olan bu film 2021-ci ildə işıq üzü görüb. Əsas rolları Mark Vaşke, Stiv Drisen, Həsən Akkuş və İsaak Dentler ifa ediblər.