Qadınları incitmək tövsiyə edilmir

Gəmiçilik şirkətinin rəhbəri İvan Kirillov qəzada həyatını itirdikdən sonra səhmlərin böyük hissəsi gözlənilmədən onun ilk nikahından olan qızına qalır. Məktəbdə riyaziyyat dərsi deyən sadə müəllimə Vera atasının bu vəsiyyətini qəbul edir. Kollektivin bu qərardan narazı qalmasına baxmayaraq, o, nəhəng müəssisənin idarəçiliyini öz üzərinə götürür.

Gəmiqayırma biznesi kimi mürəkkəb sahədə ilk addımlar yeni rəhbər üçün asan keçmir. Vera çətinliklərə sinə gərməyə çalışır və atasının birinci müavini, vaxtilə ona aşiq olmuş «Zəngli saat» ləqəbli Saşanın dəstəyinə ümid bağlayır.

«Qadınları incitmək tövsiyə edilmir» filmi 1999-cu ildə Rusiyada rejissor Valeri Axadov tərəfindən çəkilib. Ekran əsərində baş rolları Vera Qlaqoleva, Maksim Suxanov, Qalina Polskix və Aleksandr Poroxovşikov canlandırıb.