Qarğa yumurtası

Çennai şəhərinin kasıb daxmalarında yaşayan iki balaca qardaş ataları həbsdə olduğu üçün anaları və nənələri ilə birgə böyüyür. Günlərini küçələrdə keçirən uşaqlar dəmir yolu kənarından kömür toplayıb satır, boş vaxtlarında isə qarğa yuvalarından çiy yumurta götürüb içirlər. Məhz bu vərdişlərinə görə ətrafdakılar qardaşlara «Qarğa yumurtaları» ləqəbini veriblər.

Köhnə bağ sahəsinin yerində müasir pitseriya açılanda uşaqların diqqəti tamamilə buraya yönəlir. Şəhərdə peyda olan parıltılı reklamlar qardaşlarda bu qəribə yeməyin dadına baxmaq həvəsi oyadır. Onlar bir pay pitsa almaqdan ötrü öz vəziyyətlərinə görə böyük məbləğ sayılan üç yüz rupini toplamaq qərarına gəlirlər.

«Kaakkaa Muttai» («Qarğa yumurtası») filmi 2014-cü ildə Hindistanda rejissor M. Manikandan tərəfindən dram və komediya janrlarında lentə alınıb. Baş rolları C.M. Bala, Krishnamoorthy, Vijay Muthu və Nivas Adithan ifa edirlər.