Möcüzələrin dadı

Həyat yoldaşını itirmiş Luiza Leqran iki övladı ilə sakit bir əyalət şəhərində məskunlaşıb. O, vaxtilə əri ilə xoşbəxt günlər keçirdiyi bağı və həyətindəki armud ağacı olan evi tərk etmək istəmir. Luizanı gizlicə sevən Pol ona hər çətinlikdə dayaq olsa da, qadın onu yalnız yaxşı bir dost kimi qəbul edir.

Gözlənilməz bir yol hadisəsi vəziyyəti dəyişir: Luiza avtomobili ilə içinə qapanıq və ünsiyyətcil olmayan Pyer adlı bir nəfəri vurur. Bu qəza iki fərqli insanın yollarını kəsişdirir. Beləliklə, qadının qarşısında həyatına dair yeni bir seçim imkanı yaranır.

Rejissor Erik Besnard tərəfindən çəkilmiş Fransa istehsalı «Möcüzələrin dadı» (Le goût des merveilles) filmi 2015-ci ildə nümayiş olunub. Ekran əsərində rolları Virjini Efira, Natali Beder, Erve Pyer və Kristian Valsamidis paylaşıblar.