Sonuncu ev

Sietl şəhərində dörd nəfərlik ailə adi yağışlı səhərdə yolkası dalınca getməyə hazırlaşır. Lakin qapılar açılmır, pəncərələr isə heç bir zərbəyə tab gətirib sınmır və onlar evdən bayıra çıxa bilmirlər. Çox keçmədən məlum olur ki, qonşular və əslində bütün dünya da eyni vəziyyətlə üzləşib, çöldə ara vermədən yağan leysan isə heç də təbii hadisəyə bənzəmir.

"The Last House" filminin qəhrəmanları qapalı məkanda köməksiz qalaraq şəraitə uyğunlaşmağa çalışırlar. Evdəki ərzaq ehtiyatları sürətlə tükəndiyi üçün dörd nəfərin birgə qalması və mövcudluğunu qoruması getdikcə daha da çətinləşir. Onlar məhdud imkanlar daxilində və kənar aləmdən tam təcrid olunmuş halda sağ qalmağın yollarını axtarırlar.

Ekran əsərinin quruluşçu rejissoru Lui Leterryedir. Dram və qorxu janrlarını birləşdirən bu ortaq layihə ABŞ, Böyük Britaniya və Fransa kinematoqrafçıları tərəfindən 2026-cı ildə hazırlanıb. Əsas rolları Rayli Çun, Evelin Reynolds-Boysan, Sid Edvards və Oliver Henri Arnold canlandırıblar.