Aprel əhvalatı

Gənc Yudzuki universitetdə təhsil almaq məqsədilə Tokioya köçür. Böyük şəhərin qaynar mühiti onun üçün tamamilə yenidir, lakin qız tədricən bura uyğunlaşmağa çalışır. O, özünə velosiped alır, çiçəkləyən sakuranı seyr edir və qonşusu ilə səmimi münasibət qurur.

Dərslərdə utancaqlığı ilə seçilən Yudzuki müəllimin niyə məhz bu təhsil ocağını seçməsi ilə bağlı sualına cavab verərkən çaşıb qalır. O, tələbələrlə ünsiyyət saxlayır, milçəklə balıq ovu dərnəyinə qoşulur və yaxınlıqdakı kitab mağazasında işləyən uzunsaçlı gənci bəyənir.

1998-ci ildə çəkilmiş «Shigatsu monogatari» filminin rejissoru Şunci İvaidir. Yaponiya istehsalı olan melodramda rolları Qo Cibiki, Cuniçi Kubozono, Masato İbu və Yoşiro Matsumoto canlandırıb.