Sevgi anı

Səyahət jurnalı redaktoru Ji Yaqin toy ərəfəsində Yunnan vilayətinin Puer şəhərinə ezamiyyətə yollanır. Qadının əlinə təsadüfən başqa bir kişinin öz sevgilisinə yazdığı məktub keçir və maraqlısı odur ki, məktubun ünvanlandığı xanım onunla eyni adı daşıyır. Yaqin bu qeyri-adi hadisəni yeni məqaləsi üçün maraqlı mövzu hesab edir.

Eyni vaxtda bölgəyə sərbəst rəssam Xu Nianzu gəlir. O, babasının keçmiş məhəbbətini tapmaq və onun üçün illərlə yazılmış məktubları sahibinə çatdırmaq niyyətindədir. Yolları kəsişən iki gənc axtarışı birlikdə davam etdirmək qərarına gəlir və bu ortaq səfər onların daxili hisslərinə aydınlıq gətirir.

Rejissor Gavin Lin tərəfindən ərsəyə gətirilən «Sevgi anı» (A Moment of Love) filmi Çin və Tayvanın birgə istehsalıdır. 2013-cü ildə ekranlara çıxan melodramın əsas rollarında Vic Chou, Kuang Ting, Ji Qing və Liu Yun çəkilib.