Paparoti

Boğazında keçirdiyi əməliyyatdan sonra peşəkar müğənnilik karyerasına son qoymaq məcburiyyətində qalan San-cin, Kimçxon incəsənət məktəbində müəllim kimi fəaliyyət göstərməyə başlayır. Yerli cinayətkar dəstəyə bağlı olan qalmaqallı yeniyetmə Can-honun bu təhsil ocağına köçürülməsi ilə müəllimin adi iş günləri sınağa çəkilir.

Digər müəllimlər təhlükəli şagirdlə mübahisəyə girməməyə çalışsalar da, San-cin gəncə qarşı bəslədiyi narazılığı gizlətmir. Lakin San-cin təsadüfən Can-honun ifasını eşitdikdə hər şey dəyişir. Yeniyetmənin güclü səsindən heyrətlənən müəllim, ona əfsanəvi Pavarotti kimi dünya səviyyəli vokalçı olmaq arzusunu gerçəkləşdirməkdə yardım etməyə qərar verir.

Cənubi Koreya istehsalı olan musiqili dram filmi «Paparoti» 2013-cü ildə ekranlara çıxıb. Ekran əsərinin rejissoru Yun Con-çhandır, əsas rolları isə Li Ce-hun, Ço Cin-un, Pe Son-u və Kim Ci-sok canlandırıb.