Ürəyimin orqanı

Hadisələr 1963-cü ildə cərəyan edir. İnstitutu indicə bitirmiş 21 yaşlı Kan Su-ha müəllimlik etmək üçün ucqar Sanri kəndinə gəlir. Gənc mütəxəssis üçün bu, ilk iş yeridir və başlanğıc asan olmur. Yoxsul ailələrdən olan uşaqlar dərslərdə çətinlik çəkir və itaətsizlik göstərirlər, lakin Su-ha tədricən şagirdlərin rəğbətini qazanmağı bacarır.

Hon-yon adlı məktəbli qız gənc müəllimə aşiq olur. O, öz hisslərini Su-hanın bütün uşaqlara tapşırdığı gündəlikdə səmimi şəkildə qələmə alır. Həmin qeydləri yoxlayan müəllim qızın yazdıqlarını oxusa da, onun diqqəti başqa yerdədir. Su-ha həmkarı In-hiyə vurulub və ona sevgisini bildirməyə hazırlaşır.

1999-cu ildə çəkilmiş «Ürəyimin orqanı» (Nae maeumui punggeum) filminin rejissoru Li Yon-cedir. Cənubi Koreya istehsalı olan melodram janrlı bu ekran əsərində baş rolları Li Byon-hon, Con Do-yon, Li Mi-yon və Kim Don-yon canlandırıb.