Faylan

Valideynlərini itirən gənc qız qohumlarını tapmaq ümidi ilə Cənubi Koreyaya yollanır. Lakin ölkəyə çatdıqda öyrənir ki, axtardığı ailə üzvləri artıq Kanadaya köçüblər. Yad bir mühitdə təkbaşına qalan Faylan leqal şəkildə yerləşmək üçün nikah agentliyinə üz tutur və formal evliliyə razılaşır.

Onun kağız üzərindəki əri Kan-ce adlı qocalmaqda olan, nüfuzsuz və pulsuz bir qanqster olur. Kişi bu sövdələşməyə verilən pula görə razılıq verir, qız isə ölkədə rəsmi işləmək icazəsi qazanır. Onlar bir-birlərini heç vaxt görmürlər, Faylanın əlində yalnız ərinin fotosu qalır. Zaman keçdikcə qızın bu tanımadığı adama qarşı daxilində səmimi hisslər oyanır.

«Faylan» filmi 2001-ci ildə Cənubi Koreyada istehsal olunub. Rejissor Son He-sonun ərsəyə gətirdiyi melodramada əsas obrazları Çhve Min-şik və Sesiliya Çun canlandırıb.