Die Wanderhure

Orta əsrlər, Cənubi Almaniya. Varlı tacir qızı Mari öz iradəsinin əleyhinə olaraq qraf fon Kaylburqun nikahdankənar oğlu ilə evləndirilmək üzrədir. Tezliklə gənc qız amansız intriqaların qurbanına çevrilir. Nəticədə o, zorakılığa məruz qalır, zindana atılır və şəhər meydanında camaat qarşısında işgəncələrə dözməli olur.

Ölümcül vəziyyətdə olan Marini gəzərgi fahişələr tapıb sağaldırlar. Qadınların qayğısı ilə həyata qayıdan Mari artıq yalnız bir arzu ilə yaşayır: ona bu müsibətləri yaşadanlardan qisas almaq.

2010-cu ildə təqdim olunmuş «Die Wanderhure» dram filminin rejissoru Hansyorg Turndur. Almaniya, Macarıstan və Avstriya istehsalı olan bu ekran əsərində əsas obrazları Daniel Rösner, Heyko Pinkovski, Andreas Günter və Bert Tişendorf canlandırıb.