Amerika hoteli

Qaranlıq yeraltı qarajda Elenin avtomobili az qala Jili vuracaqdı. Hadisə ilə bağlı protokol tərtib etmək məqsədilə onlar gecə açıq olan kafeyə getməyə məcbur olurlar. Orada, masa arxasında keçirdikləri ilk gecə hər iki qəhrəmanın sonrakı həyat yolunu büsbütün dəyişir.

Yerli xəstəxanada anestezioloq işləyən Elen kədər içində tənha ömür sürür, çünki sevdiyi insan dəniz kənarında boğularaq həlak olub. Bələdçi kimi xırda işlərə baxan Jil isə əyləncəli həyat sürən, qadınların diqqətini asanlıqla cəlb edən qayğısız biridir. Eleni görən kimi heyran qalan Jil bu qadını itirmək istəmir. Təsadüfi tanışlıq getdikcə hər iki tərəfi həm özünə çəkən, həm də qorxudan güclü bir ehtirasa çevrilir.

«Hôtel des Amériques» adlı fransız filminin rejissoru Andre Teşinedir. 1981-ci ildə çəkilmiş melodram janrlı ekran əsərində Dominik Lavanon, Fransua Perro, Etyen Şiko və Katrin Reti rol alıblar.