Tanrı var, onun adı Petruniyadır

Uğursuz keçən iş müsahibəsindən sonra otuz iki yaşlı Petruniya evə qayıdarkən təsadüfən dini ənənənin şahidi olur. Yerli kişilər çaya atılan xaçı tapmaq üçün soyuq suda yarışırlar. Gözlənilmədən suya tullanan gənc qadın bütün rəqiblərini qabaqlayaraq müqəddəs əşyanı birinci əldə edir.

Qadının bu qələbəsi yerli ictimaiyyətdə və kilsə xadimlərində böyük narazılıq doğurur. Əsrlər boyu yalnız kişilərə aid hesab edilən bu ənənənin pozulması Şimali Makedoniyanın mühafizəkar mühitində kəskin etirazlara səbəb olur. Qalib gələn qadın isə ona qarşı yönələn sərt təzyiqlərlə üz-üzə qalır.

«Gospod postoi, imeto i' e Petrunija» dram filminin rejissoru Teona Struqar Mitevskadır. 2019-cu ildə Şimali Makedoniya, Fransa, Belçika, Sloveniya və Xorvatiyanın birgə istehsalı ilə çəkilən ekran əsərində baş rolları Zoritsa Nuşeva, Labina Mitevska, Stefan Vuyisiç və Suad Beqovski canlandırıb.