Sadəlövh qatil

Anasının vəfatından sonra ətrafdakıların «axmaq» deyə çağırdığı Sven adlı gənc varlı mülkədar Höqlundun təsərrüfatında işləməyə başlayır. Qəddar fermer ona heç bir zəhməthaqqı vermir, tövlədə yatırır və daim təhqir edir. Dözülməz şəraitə tab gətirə bilməyən gənc nəhayət qaçmaq qərarına gəlir.

Svenə ona ilk dəfə insan kimi yanaşan Anna və onun ailəsi qucaq açır. Yeni evində dinclik tapan gənc təhqirlərdən uzaq yaşamaq istəyir. Lakin heç kimin ona qarşı çıxmasına icazə verməyən Höqlund öz əmlakı hesab etdiyi işçidən bu qədər asanlıqla əl çəkmək fikrində deyil.

İsveç istehsalı olan «Den enfaldige mördaren» dram filmi 1981-ci ildə rejissor Hans Alfredson tərəfindən çəkilib. Ekran əsərində baş rolları Stellan Skarsqard, Lena-Pia Bernhardson, Yosta Ekman və Karl Bilkvist canlandırıb.