Dil To Pagal Hai

Teatr rejissoru Rahul əsl sevgiyə inanmır və iki insanın ömür boyu necə birgə yaşaya biləcəyini anlamır. O, yalnız xəyallarında canlandırdığı Maya adlı qız haqqında düşünür, lakin arzusunun çox yaxında olduğundan xəbərsizdir. Uşaqlıqdan bəri ona aşiq olan rəqqasə Nişa hisslərini gizlətsə də, gənc rejissor bütün diqqətini xəyali qəhrəmanına həsr edəcəyi yeni tamaşaya yönəldir.

Nişa ayağından zədə alıb Londona müalicəyə getdikdə tamaşadakı baş rol qəflətən kollektivə yeni qatılan Pudcaya həvalə olunur. Məşqlər zamanı Rahul Pudcanın məhz axtardığı həmin xəyal olduğunu dərk edir və ona aşiq olur. Qız da eyni hissləri bölüşsə də, başqa birinə nişanlıdır və verdiyi vədə görə bu münasibəti bitirməyə hazır deyil.

1997-ci ildə ekranlara çıxan «Dil To Pagal Hai» filminin quruluşçu rejissoru Yaş Çopradır. Hindistan istehsalı olan bu musiqili dramda baş rolları Şahrux Xan, Madhuri Dikşit, Karişma Kapur və Akşay Kumar canlandırıb.