Əsl sarışın

Co və Meri altı ildir ki, bir yerdə yaşayırlar və bəzən övlad sahibi olmaq və ya başqa yerə köçmək barədə düşünürlər. Lakin maddi çətinliklər onların bu planlarına mane olur. Co böyük aktyorluq karyerası xəyalları qursa da, hələlik ofisiant kimi çalışır. Ailənin əsas xərclərini isə dəbli bir fotoqrafın yanında vizajist işləyən Meri qarşılayır.

Uzun sürən uğursuzluqlardan sonra Co qarşısına çıxan ilk təklifi qəbul edir və Madonnanın musiqi klipində arxa planda kiçik bir rola çəkilir. Elə həmin ərəfədə onunla birlikdə işləyən yaxın dostu Bob böyük bir uğur qazanır. Bob populyar televiziya serialında baş rolu əldə edir.

1997-ci il istehsalı olan «Əsl sarışın» komediya-dram filmini rejissor Tom DiÇillo lentə alıb. ABŞ istehsalı ekran əsərində əsas rolları Metyu Modayn, Aleksandra Uentuort, Maksvell Kolfild və Marlo Tomas canlandırıblar.