Tənha Sərnişin

İnvestisiya şirkətində şöbə müdiri işləyən Kan Ce-hun oğlunun xaricdə yaxşı təhsil alması üçün iki il əvvəl ailəsini Avstraliyaya yola salıb. Gərgin iş qrafiki üzündən doğmalarını yalnız internet vasitəsilə görə bilən kişi bütün vaxtını karyerasına sərf edir. Lakin çalışdığı qurum böyük bir fırıldaqçılıq qalmaqalına qarışanda hər şey alt-üst olur.

Məhkəmə prosesi və həbs təhlükəsi ilə üz-üzə qalan Ce-hun ölkəni tərk etmək qərarına gəlir. O, sığınacaq tapmaq üçün Avstraliyaya, arvadı ilə övladının yanına qaçır. Lakin yad ölkəyə çatdıqda anlayır ki, ayrılıqda keçən illər ərzində doğmaları artıq onsuz yaşamağa alışıb.

«Tənha Sərnişin» (The Single Rider) dram filmi 2017-ci ildə Cənubi Koreyada istehsal olunub. Rejissor Li Cu-yonun ekranlaşdırdığı layihədə əsas obrazları Li Byon-hon, Kon Hyo-cin, An So-hi və Cek Kempbell canlandırıb.