Sürəyya M.-in daşqalaq edilməsi

Fransalı bir müxbirin avtomobili İranın ucqar kəndlərinin birində xarab olur və o, yerli sakinlərdən kömək istəmək məcburiyyətində qalır. Lakin burada onunla görüşməyə çalışan başqa biri peyda olur: Zəhra adlı qadın təkidlə jurnalistin ardınca düşür. O, bir gün əvvəl qətlə yetirilmiş bacısı qızı Sürəyya barədə əsl həqiqəti xarici qonağa çatdırmaq niyyətindədir.

Zəhra yaxın qohumunun amansızcasına öldürülməsindən, dini qanunlardan şəxsi məqsədləri üçün istifadə edən kənd sakinlərinin əməllərindən söz açır. Qadının yeganə ümidi bu dəhşətli hadisəni lentə alıb kənddən çıxara biləcək jurnalistdir; o istəyir ki, törədilən zorakılıqdan bütün dünya xəbər tutsun.

«The Stoning of Soraya M.» dram filmi 2008-ci ildə ABŞ-da rejissor Sayrus Növrəstə tərəfindən ekranlaşdırılıb. Ekran əsərində əsas rolları Şöhrə Ağdaşlu, Mojan Marno, Cim Kevizel və Nəvid Niqahban canlandırıb.