Ata

Uğurlu sahibkar Mixal həyat yoldaşı Zuzanna ilə birlikdə ikiyaşlı qızını böyüdür. Gərgin keçən səhərlərin birində xanımı ondan uşağı körpələr evinə aparmasını xahiş edir, halbuki bu işlə adətən özü məşğul olurdu. İş qayğıları ilə yüklənmiş Mixal sükan arxasına əyləşir və qızını artıq bağçaya qoyduğunu zənn edərək birbaşa ofisinə yollanır.

Bütün iş gününü kabinetində keçirən ata yalnız bir neçə saatdan sonra dəhşətli həqiqəti anlayır: balaca qız bütün bu müddətdə yayın istisində maşında qapalı qalıb. Baş verən faciə ailənin həyatını bir anda alt-üst edir. Qəhrəman qarşıda duran məhkəmə və böyük günahkarlıq hissi ilə üz-üzə qalır.

«Ata» (Otec) dram filminin rejissoru Tereza Nvotová-dır. Layihə Slovakiya, Çexiya və Polşanın birgə istehsalıdır. Filmdə əsas rolları Milan Ondrík, Tereza Hofová, Roman Polák və Igor Prielozny canlandırıblar. Ekran əsəri 2025-ci ildə işıq üzü görüb.