Selin

İyirmi iki yaşlı Selin üçün həyat qəfil çətin sınaqlarla üz-üzə qalır. Varlı atasını itirən gənc qız onun son nəfəsində övladlığa götürüldüyünü öyrənir. Bu xəbərdən sonra mirasdan öz istəyi ilə imtina edən Selini tamahkar nişanlısı dərhal tərk edir və o, böyük bir sarsıntı içində tək qalır.

Küçədə çarəsiz halda olan və həyatına son qoymaq həddinə çatan qızı yerli tibb bacısı Jenevyeva görür. Qadın Selini ölümdən xilas edərək öz himayəsinə götürür və onun toparlanması üçün əlindən gələni edir. Tibb bacısı gənc qıza relaksasiya və meditasiya üsulları vasitəsilə mənəvi rahatlıq tapmaqda kömək göstərir.

1992-ci ildə Fransada istehsal olunmuş «Selin» dram filminin rejissoru Jan-Klod Brisso olub. Əsas rolları Liza Qabaston, Siril Qravezat, Liza Voltye və Elodi Plake canlandırıblar.