Qurğuşun illəri

1970-ci illərin ortalarında baş verən siyasi hadisələr iki bacının həyat yolunu kəskin şəkildə ayırır. Marianna radikallaşaraq terror qrupuna qoşulur, silahlı basqınlarda və bank soyğunlarında iştirak edir. Yazıçı olan Culiana isə dövlət sisteminə qarşı mətbuat vasitəsilə etirazını bildirir. Yeraltı fəaliyyətə başlayan Marianna dördyaşlı oğlunu bacısına tapşırmaq istəsə də, sevgilisi Volfqanq və işi ilə məşğul olan Culiana bundan imtina edir. Nəticədə uşağın atası intihar edir, körpə isə dövlət himayəsinə verilir.

Bir müddət sonra yoldaşları ilə bacısının evinə gələn Marianna onu öz məqsədləri üçün istifadə edir və seçdiyi dinc mübarizə tərzini alçaldır. Bir müddət sonra radikal bacı həbsxanaya düşür və orada müəmmalı şəkildə həyatını itirir. Ağır günahkarlıq hissi keçirən Culiana bacısının rəsmi qurumlar tərəfindən qəsdən susdurulduğunu sübut etməyə çalışır.

1981-ci il istehsalı olan «Die bleierne Zeit» filmi Qərbi Almaniya kinematoqrafçıları tərəfindən lentə alınıb. Rejissor Marqarete fon Trottanın çəkdiyi bu dram filmində rolları Yutta Ləmpe, Doris Şade, Rüdiger Foqler və Feliks Müller canlandırıb.