İmperatorun yeni libası

Napoleon Vaterloo döyüşündəki məğlubiyyətdən sonra Müqəddəs Yelena adasında sürgün həyatı yaşayır. Onun tərəfdarları cəsarətli bir plan qururlar: adada hökmdarın yerinə ona bənzəyən dənizçi Ejeni qoyur, Napoleonu isə saxta adla gizlicə Fransaya yola salırlar.

Lakin hər şey planlaşdırıldığı kimi getmir. Keçmiş imperator Fransada nəzərdə tutulan görüşə gecikir, adada qalan oxşarı isə içkiyə qurşanaraq bu rolu tərk etməkdən qəti şəkildə boyun qaçırır. Parisə təkbaşına çatan əsl Napoleona isə heç kim inanmır, çünki şəhərin ruhi xəstəxanaları özünü imperator adlandıran insanlarla doludur.

«The Emperor's New Clothes» filmi rejissor Alan Teylor tərəfindən çəkilib. Böyük Britaniya, Almaniya və İtaliyanın birgə istehsalı olan bu ekran əsəri 2001-ci ildə nümayişə çıxıb. Əsas rollarda İan Holm, İben Hyeyle, Tim Makinnerni və Tom Uotson çəkiliblər.