Dayə

1990-cı illərin əvvəllərində gənc ibtidai sinif müəllimi Keyt gəlirli bir təklifi dəyərləndirərək yetim qalmış səkkiz yaşlı Floranın tərbiyəçisi olur. Qıza əvvəl baxan dayənin qəfil qaçdığını öyrənən Keyt ucqar və dəbdəbəli malikanəyə yollanır.

Evə çatdıqdan sonra məlum olur ki, qızın Maylz adlı yeniyetmə qardaşı davaya görə özəl məktəbdən qovularaq evə qayıdıb. Yaşlı xidmətçi missis Qroz balaca Floranın həyətdən kənara çıxmasına icazə vermir, Keyt isə ilk gecədən etibarən qəsrdə qorxulu və qəribə səslər eşitməyə başlayır.

«Dayə» (The Turning) qorxu və dram filmini 2020-ci ildə rejissor Floriya Sicizmondi çəkib. ABŞ, Böyük Britaniya, Kanada, İrlandiya və Hindistanın birgə istehsalı olan ekran işində baş rolları Makkenzi Devis, Denna Tomsen, Karen İqan və Mark Hubermen ifa edirlər.