Bokeh

ABŞ-dan olan gənc cütlük romantik tətil üçün İslandiyaya yola düşür. Səyahət sakit məcrada davam edərkən, səhərlərin birində onlar qeyri-adi bir mənzərə ilə qarşılaşırlar. Ətrafda heç kim qalmır və bütün şəhər səssizliyə bürünür.

Tezliklə aydın olur ki, Yer üzündəki bütün insanlar qəfil yox olub. «Bokeh» adlı fantastik dram filminin qəhrəmanları kimsəsiz qalmış bu soyuq diyarda yeni reallıqla üzləşmək və baş verənləri anlamaq məcburiyyətində qalırlar.

Ekran əsəri 2017-ci ildə ABŞ və İslandiya kinematoqrafçılarının birgə əməyi ilə ərsəyə gətirilib. Filmin rejissorları Endrü Sallivan və Coffri Ortveyn, baş rol ifaçıları isə Mayka Monro, Berqlind Rous Siqurdardouttir, Qunnar Helqason və Adnar Younssondur.