XX əsr qızı

1999-cu ildə Çhoncu şəhərində yaşayan məktəbli qız Na Bo-ra yaxın rəfiqəsini ürək əməliyyatı üçün ABŞ-yə yola salır. Rəfiqəsi getməzdən dərhal əvvəl məktəbə yeni gələn oğlana aşiq olur və uzaq yola böyük həyəcanla çıxır. Onu sakitləşdirmək istəyən Bo-ra sevdiyi oğlan haqqında hər şeyi öyrənib elektron poçtla xəbər verəcəyinə söz verir.

Məlumat toplamaq qız üçün əsl izləmə prosesinə çevrilir. Bo-ra bir gün həmin oğlanı xuliqanların əlindən xilas edir və işlər gözlənilməz istiqamət alır. Bu hadisədən sonra həm rəfiqəsinin bəyəndiyi gənc, həm də onun yaxın dostu Bo-raya qarşı hisslər bəsləməyə başlayır.

2022-ci ildə ekranlara çıxan Cənubi Koreya filmi «XX əsr qızı» rejissor Pan U-rinin işidir. Melodram, dram və komediya janrlarını birləşdirən layihədə əsas rolları Kim Yu-con, Pyon U-sok, Pak Çon-u və No Yun-so canlandırıb.