Dieses bescheuerte Herz

Gənc Lenni günlərini əyləncə məclislərində keçirir və varlı atasının hesabına qayğısız həyat sürür. Elə həmin şəhərdə yaşayan on beş yaşlı David isə anadangəlmə ürək qüsuru səbəbindən vaxtının çoxunu evdə keçirməyə məcburdur. Oğlunun tənbəlliyindən təngə gələn ata vəziyyəti dəyişmək üçün Lenniyə səhhəti ağır olan bu yeniyetməyə qulluq etməyi tapşırır.

Məcburi başlayan bu ünsiyyət tezliklə səmimi bir dostluğa çevrilir. Lenni Davidin arzularını gerçəkləşdirməyə və ona həyatın gözəlliklərini göstərməyə çalışır. Davidlə keçirdiyi vaxt isə Lenniyə məsuliyyət hissini dərk etməyə və ətrafındakı insanlara dəyər verməyə kömək edir.

Almaniya istehsalı olan «Dieses bescheuerte Herz» filmi 2017-ci ildə rejissor Mark Rotemund tərəfindən lentə alınıb. Dram və komediya janrındakı ekran əsərində baş rolları Elyas M'Barek, Filip Şvarts, Nadina Vrits və Uve Proyss canlandırıb.