Ülgüc üstündə

Aleksandra Pokrovskaya qılıncoynatma aləmində mümkün olan bütün zirvələri fəth edib. O, şöhrət və sərvət sahibidir, lakin idman karyerasını tamamlamaq üçün tək bir hədəf — Olimpiya qızılı çatışmır. Zirvəyə gedən bu yolda onun qarşısına əyalətdən yenicə gəlmiş gənc idmançı Kira Yeqorova çıxır. Sürətlə uğur qazanan Kira bütün yarışlarda qalib gəlir və ictimaiyyətin diqqət mərkəzinə çevrilir.

Yeni rəqibin əsas məqsədi Pokrovskayanın yerini almaqdır. İki idmançı arasındakı gərgin rəqabət tezliklə idman zallarından kənara çıxaraq onların şəxsi həyatına da sirayət edir. Şöhrət və çempionluq uğrunda mübarizə getdikcə idarəolunmaz həddə çatır.

«Ülgüc üstündə» idman dramı 2020-ci ildə rusiyalı rejissor Eduard Bordukov tərəfindən lentə alınıb. Filmdə əsas rolları Svetlana Xodçenkova, Stasya Miloslavskaya, Sergey Puskepalis və Aleksey Barabaş canlandırıblar.