Bataqlıq kralının qızı

On yaşlı Helena meşənin dərinliyində valideynləri ilə birlikdə yaşayırdı. Atası ona izləri oxumağı, ov etməyi və vəhşi təbiətdə sağ qalmağı öyrədirdi, anası isə daim narazı və kədərli görünürdü. Təsadüfən onların daxmasına gəlib çıxan bir turist anaya qızını götürüb oradan qaçmaq imkanı verir. Yalnız bundan sonra Helena öyrənir ki, atası əslində təhlükəli cinayətkardır və anasını vaxtilə qaçıraraq illərlə əsirlikdə saxlayıb.

İyirmi il keçdikdən sonra Helena öz ailəsini qurur, lakin həyat yoldaşına keçmişi barədə heç nə danışmır. Atasının həbsxanadan qaçması onun sakit həyatını alt-üst edir. Ailəsini qorumaq istəyən qadın həm sirrini açmaq, həm də uşaqlıqda atasından öyrəndiyi bütün bacarıqlardan istifadə etmək məcburiyyətində qalır.

2023-cü il istehsalı olan «Bataqlıq kralının qızı» (The Marsh King's Daughter) filminin rejissoru Nil Börgerdir. ABŞ istehsalı olan bu dramatik trillerdə baş rolları Ben Mendelson, Kris Vayolett, Gil Birminqem və Cozef Deyli canlandırıblar.