Vesper

Süni virusların və orqanizmlərin təbiətə yayılması nəticəsində Yer üzündə heyvanlar və yeyilə bilən bitkilər məhv olub, bəşəriyyətin böyük hissəsi isə sıradan çıxıb. Cəmiyyətin imtiyazlı təbəqəsi qalalar adlanan qapalı şəhərlərə çəkilib, kənarda qalanlar isə yalnız bir dəfə məhsul verən toxumları onlardan alaraq yaşamağa çalışır. Belə bir mühitdə yaşayan on üç yaşlı Vesper yataq xəstəsi olan atasına baxır.

«Vesper» elmi-fantastik filmində gənc qız bioloji təcrübələr apararaq yeni bitki növləri yetişdirməyə və toxumların genetik kodunu qırmağa çalışır. Qəzaya uğramış uçan aparatdan sağ çıxan yaralı bir qadınla qarşılaşması onun həyatını dəyişir. Vesper bu yadelliyə kömək edərək onun vasitəsilə qorunan qalaya daxil ola biləcəyinə ümid bəsləyir.

Layihə Böyük Britaniya, Fransa, Belçika və Litva kinematoqrafçılarının birgə əməkdaşlığı ilə hazırlanıb. Filmin rejissor kürsüsünü Kristina Buojite və Bruno Samper bölüşüb, baş rollarda isə Raffiella Çepmen və Eddi Marsan çəkilib.