Nostalgiya

Rus yazıçısı Andrey Qorçakov vaxtilə bu torpaqlarda olmuş təhkimli bəstəkar Pavel Sosnovskinin izlərini araşdırmaq üçün İtaliyaya yollanır. Səfər boyu ona bələdçilik edən tərcüməçi Yudjeniya yol yoldaşının qəlbindəki kədəri anlamaq üçün Arseni Tarkovskinin şeirlər kitabına üz tutur.

Tədricən Qorçakov araşdırdığı musiqiçinin taleyi ilə öz həyatı arasında bənzərliklər görməyə başlayır. Qərib eldə özünü tamamilə yad hiss edən yazıçı, eyni zamanda evinə qayıtmağa da imkan tapmır. Onu bürüyən ağır durğunluq və vətən həsrəti get-gedə dözülməz bir mənəvi xəstəliyə çevrilir.

«Nostalghia» dram filmi 1983-cü ildə rejissor Andrey Tarkovski tərəfindən İtaliya və SSRİ kinematoqrafçılarının birgə istehsalı kimi çəkilib. Əsas rolları Oleq Yankovski, Erland Yuzefson, Domitsiana Cordano və Patritsiya Terreno canlandırıb.