Növbəti cümədən sonra

Kreyq və əmisi oğlu Dey-Dey nəhayət valideynlərinin yanından köçərək eyni mənzildə birgə yaşamağa başlayırlar. Şən və qayğısız vaxt keçirən gənclər Milad bayramına hazırlaşırlar. Lakin bayram ərəfəsində onların evinə Şaxta baba libasında bir oğru girir. Naməlum şəxs təkcə bayram hədiyyələrini deyil, həm də dinamiklərin içində gizlədilən kirayə pulunu oğurlayır.

Bütün vəsaitlərini itirən qohumlar bayram ərəfəsində küçədə qalmaq təhlükəsi ilə üzləşirlər. Yaşayış yerlərindən çıxarılmaq ehtimalı və korlanmış bayram əhval-ruhiyyəsi onları çətin vəziyyətə salır. Buna baxmayaraq, qəhrəmanlar xoşagəlməz hadisələrin bayram sevinclərini məhv etməsinə imkan verməmək üçün hərəkətə keçirlər.

Rejissor Markus Rəboy tərəfindən çəkilən «Friday After Next» komediya filmi 2002-ci ildə ABŞ-da istehsal olunub və məşhur seriyanın üçüncü hissəsidir. Ekran işində əsas rolları Mayk Epps, Anna Maria Horsford, Starletta Dyupua və Maz Cobrani canlandırıblar.