Tək Olmayacaqsan

Hadisələr XIX əsrdə Makedoniya kəndlərinin birində cərəyan edir. Görkəmini dəyişməyi bacaran qədim varlıq yenicə doğulmuş körpəni aparmaq istəyir, lakin anasının yalvarışlarından sonra on altı il gözləməyə razılaşır. Qızcığaz bütün bu illəri insanlardan uzaqda, müqəddəs bir mağarada gizlənərək keçirsə də, vədə tamam olanda ifritə onu öz yanına aparır.

Uzun illərdən sonra mağaradan çıxan gənc qız ətraf aləmi kəşf etməyə başlayır və tezliklə yeni himayədarı onu da özü kimi bir varlığa çevirir. İnsan olmağın nə demək olduğunu dərk etmək istəyən gənc cadugər kənd sakinlərinə qəsd edərək onların cildinə girməyə qərar verir.

«You Won't Be Alone» filmi rejissor Qoran Stolevski tərəfindən ekranlaşdırılıb. Böyük Britaniya, Serbiya və Avstraliya istehsalı olan layihədə baş rolları Elis Enqlert, Anamariya Marinka, Veselina Mixayloviç və Senka Kolozova ifa edirlər.