Turne

Vaxtilə Parisdəki uğurlu karyerasını, yaxınlarını və köhnə münasibətlərini geridə qoyub Amerikaya köçən televiziya prodüseri Joakim vətəninə qayıdır. O, Fransaya amerikalı rəqqasələrdən ibarət «Nyu-Burlesk» truppasını gətirir. Qadınların səmimi və cəsarətli çıxışları əyalət şəhərlərində böyük maraqla qarşılanır, tamaşaçılara bayram əhvalı bəxş edir.

Qastrol səfəri ucuz otellər və daimi maliyyə çətinlikləri ilə müşayiət olunsa da, truppa Parisdəki möhtəşəm çıxışa ümid bəsləyir. Lakin köhnə bir dostun xəyanəti ucbatından konsert zalının icarəsi ləğv edilir və planlar alt-üst olur. Joakim məsələni yoluna qoymaq üçün paytaxta getməli olur və orada unumağa çalışdığı keçmişi ilə yenidən üz-üzə qalır.

Komediya və dram janrındakı «Turne» filmi 2010-cu ildə Fransa və Almaniyanın birgə istehsalı kimi təqdim edilib. Ekran əsərinin rejissoru Matye Amalrikdir, əsas rollarda isə Jüli Ferye, Derti Martini, Süzann Remsi və Andre S. Labart çəkilib.