Köpək dişi

Şəhərin kənarındakı hündür hasarla əhatələnmiş evdə ata, ana və onların üç böyümüş övladı yaşayır. Gənclər həyatları boyu həyətdən kənara çıxmayıb və dünyanı yalnız valideynlərinin uydurduğu qaydalarla qavrayırlar. Onların təsəvvüründə səmada uçan təyyarələr kiçik oyuncaqdır, «zombi» kəlməsi isə sadəcə sarı bir çiçəyin adını bildirir.

Kənar aləmdən bu qapalı məkana yalnız atanın iş yerində mühafizəçi işləyən Kristina buraxılır. O, ailəyə yetkinlik yaşına çatmış oğulun cinsi ehtiyaclarını ödəməsi məqsədilə dəvət edilir. Övladlara aşılanan ən mühüm qanuna əsasən, insan yalnız sağ köpək dişi düşdükdən sonra bu evi tərk edə bilər.

«Kynodontas» dramatik triller filmi 2009-cu ildə Yunanıstanda istehsal olunub. Ekran əsərinin rejissoru Yorqos Lantimosdur. Əsas rolları Mari Tsoni, Xristos Passalis, Anna Kalaytsidu və Stiv Krikris canlandırıblar.