Radioulduzlar

Nyu-Yorkda stendap komiki kimi uğur qazana bilməyən Ben şəxsi həyatında da böhranla üzləşir. Uğursuzluqdan sonra Parisə qayıdan gənc Blast FM radiosunda iş tapır. Burada o, Breakfast-club adlı səhər şousunun aparıcıları Aleks və Arnold ilə tanış olaraq onların komandasına qoşulur.

Çox keçmədən verilişin dinləyici sayı kəskin şəkildə azalır və layihə bağlanmaq təhlükəsi ilə üzləşir. Vəziyyəti xilas etmək istəyən komanda dinləyicilərlə birbaşa görüşmək üçün Fransa boyu avtobus turuna çıxmağa qərar verir. Paytaxt həyatına öyrəşmiş radio heyətini ölkənin müxtəlif bölgələrində gözlənilməz hadisələr və yeni kəşflər gözləyir.

«Radiostars» filmi 2012-ci ildə Fransada dram və komediya janrında çəkilib. Ekran əsərinin rejissoru Romeyn Levi, baş rol ifaçıları isə Manu Paye, Jan-Lui Barselona, Mona Valravens və Duqlas Attaldır.