Əziz Zoe

Pittsburqda yaşayan on beş yaşlı Tess anası Elli, ögey atası Devid və ögey bacısı Em ilə birlikdə qalır. Yeniyetmənin doğma atası Nik isə yaxınlıqdakı nisbətən kasıb məhəllədə məskunlaşıb. Ailənin bütün üzvləri arasında uzun müddətdir kədərli və ağır bir ab-hava hökm sürür, çünki 2001-ci il sentyabrın 11-də baş verən hadisələr zamanı onlar evin ən kiçiyi olan Zoeni itiriblər.

Əvvəlcə dərdi birlikdə çəkməyə çalışsalar da, zaman keçdikcə Tess heç kimin onun acısını anlamadığını düşünməyə başlayır. Həyata yenidən tutunmaq istəyən qız çıxış yolunu dünyasını dəyişmiş bacısına məktublar yazmaqda tapır. Bu məktublarda o, itkidən sonra ailənin başına gələnləri və öz daxili hisslərini səmimi şəkildə qələmə alır.

ABŞ istehsalı olan «Əziz Zoe» («Dear Zoe») dram filmi 2022-ci ildə ekranlara çıxıb. Ekran əsərinin rejissoru Qren Uellsdir, əsas obrazları isə Megan Goedewaagen, Uilyam Kaniya, Lori Klatşer və Tiffani Sender Makkenzi canlandırıb.