Mən danışa bilirəm

Prinsipial dövlət qulluqçusu Pak Min-ce rayon idarəsində yenicə fəaliyyətə başlayır. İşə başladığı ilk günlərdən etibarən o, otuz ildən artıqdır ki, şikayətləri ilə məmurları təngə gətirən yaşlı qadın Na Ok-punun müraciətləri ilə qarşılaşır.

Yaşlı qadın gənc məmurun ingilis dilində səlis danışdığını öyrəndikdə vəziyyət dəyişir. Məlum olur ki, Ok-pun Amerikada yaşayan qardaşı ilə əlaqə saxlamaq üçün bu dili öyrənmək istəyir. Min-ce əvvəlcə dərslər keçməyə razılaşmasa da, qadının onun məktəbli qardaşına ev yeməkləri hazırlayıb qayğı göstərdiyini bildikdən sonra fikrini dəyişir. Beləliklə, onların arasında səmimi bir dostluq yaranır.

«Mən danışa bilirəm» (Ai kaen seupikeu) filmi 2017-ci ildə Cənubi Koreyada istehsal olunub. Rejissor Kim Hyon-sokun çəkdiyi bu dramatik komediyada baş rolları Li Ce-hun, Na Mun-hi, Pak Çhol-min və Yom Hye-ran canlandırıb.